عبير نعمة برساله حب لزوجها

عبير نعمة في رسالة مؤثرة مليئة بالحب لزوجها بهذه المناسبة!

عبير نعمة في رسالة مؤثرة مليئة بالحب لزوجها بهذه المناسبة!

كتبت النجمة اللبنانية عبير نعمة رسالة إلى زوجها جوليو عيد بمناسبة عيد ميلاده حيث كتبت له رسالة مليئة بالحب والغرام عبر حسابها الرسمي على موقع فايسبوك.

كما قالت عبير نعمة:

“عيد ميلاد حبيبي مرق من كم يوم وأنا مسافرة وبعيدة عنو وعن بنتي من شهور اسمحولي خبّركن شوي عن الإنسان اللي بيملك قلبي سبب سعادتي وسبب نجاحي وقوّتي أنا ممتنة للحياة اللي عطيتني ضو منها: جوليو عيد، الإنسان والموسيقي الإستثنائي”.

كما تابعت نعمة:

“يا جوليو ما بعرف شو بعمل بحياتي من دونك؟
إنت الضو بقلب كل عتمة وأنا بغربة من دونك و هيدي رسالة حب وإمتنان قدام العالم كلو”.

كما أضافت صاحبة “وينك”:

“كل خطوة فنيّة حلوة ، أنا مدينة فيها لزوجي هو الملاك المخطّط اللي بيعطيني جوانح حتى حلّق مقدّملي حياته ووقته لأنه مؤمن إنو نجاحي هو نجاحو..”.

كما أكملت قائلة:

“جوليو الملاك الحارس يلّي ماسكني بإيدي وآخدني من 12 سنة على حقول كلها ورود بيحمل عني الشّوك وكل همومي وبيسهر على كل أحلامي حتى انا أقدر نام..”.

وعن عمله معها، قالت:

“كل إنتاج موسيقي، كل المهرجانات الدوليّة والعروض العالميّة وكل تفصيل لأي مشروع موسيقي قدر يشوف النور، حصل بمتابعتو وتنسيقو وتحضيرو مع كل الأطراف بكل الأوقات حبيبي ترك أحلامو على جنب وكرّس كل وقتو وشغفو وفكرو وطموحو لمشروعي وصارت أحلامي أحلامو و أهدافي أهدافو”.

كما أضافت:

“قديش محظوظة إنو نحنا بنفس المجال ومنشتغل موسيقى سوا، وشو حلو لما غنّي من ألحانو!! “حكاية” شو بحبا لهالاغنية إنسان عظيم كرّس كل معرفتو وقتو وحبو وطاقاتو الموسيقية والفكرية والإدارية لحتى نقدر نحقق الكتير “.

كما ختمت عبير:

“الأهم انو أحلا بيّ ليارا وقلبو من دهب, وحياتنا سوا أحلا من الحلم وأنا بحبو تتخلص الدني. هيدي حكايتي حكيتا:)وبقلبكن خبّيتها:) وبيضل بهالأيام السودا ما إلنا إلا اللي منحبن وبيحبونا. ولما نحكي عنن منتذكر إنو بعدا الدني بخير.
جوليو، عقبال المية يا حبيبي”.

رابط المنشور فيسبوك